রনি চাঙমা (পুনঙচান)

ভেইলক,
অক্ত এচ্যি লাড়েই গুরিবার
কধক আর তলে পুরি থেবং
কধক আর জুরো গুরি থেবং?
অক্ত এচ্যি মু হুলি কধা হবার।

ভেইলক,
তুমি হি হবর প?
নান্ন্যেচর, লংগদু, ভূজনছড়া হাবাহুদোত আরাঙ্ মাদিত লো ঝুরি পুজ্জ্যে
লোগাং ছড়ানালত ভাজি যিয়ে আজার আজার বাপ-বা, ভেই-বোনর লো
এনি বিজগর পাদাত থেই যেব, যুনি আমি লাড়েই নঅ গুরিই,
অক্ত এচ্যি উযেয় উযেয় জেবার।

ভেইলক,
জুরো গুরি ন-থেবং এজঅ বেক্কুনি
অক্ত এচ্যি হিজেক কারিবার,
দিন দিন জুম্মউনর অধিকার হারি লদন একদাগিয়ে
অক্ত এচ্যি লাড়েই গুরিবার।

ভেইলক,
জুগোদুক্ক্যান চুজি চুজি হারিলদন আমা জাগাআনি
হারিলদন আমা জুমানি।
এই জুমানি, জাগানিত্তে চোগিদার লাগিবু
চোগি ন-থেলে হারি লবাক বেক্কানি
অক্ত এচ্যি লাড়েই গুরিবার।

ভেইলক,
ডরেবার কনঅ হারণ নেই
আমি একঝাক, আমি ন-ডরেই,
ন-ডরেবা আমা লগে ফেদে ফেদে গল্লে
আবাজত থুম গরেবঙ।

ভেইলক,
লারমার চেদন মনসুন্ধুকত লইনে হুজ ফেলেবঙ
মোন মুড়ো উদিবং, লামিবং অধিকারত্তে কধা কবং
তুও ন-ডরেবং
অক্ত এচ্যি লাড়েই গুরিবার।