অক্ত থাক্কে ভালেদর চিদে গরানা
কাঞ্চনা চাঙমা
তোমাত্তুন গম লাগেনি?
তারুম বনর নাকশা ফুলর তুম্বাচ
বিজু পেগর গীদ
রেত অলে ধুধু-আঙর র।
শুন্যনি?
রাধামন-ধনপুদির লাড়েইয়োর কধা
গেঙহুলির গানর সুরে ধুধুগর তালে নাজিদাক আজু নানু দাগি।
জুমো সোনা রঙর ধান শীজে তোদেগে হাদে, আহ্
ভুলোং ধুবোর সেরে জুনি পুগ বেড়াদে দেখ্যনি ইরুক জনম লইয়ে গাভুচ্ছে গাভুরী দাগি?
হনদিন জানিবার চেয়োনি?
বরপরঙর বিজগ কধা
যারা স্ববনঅ ধক আদাম আহ্ ইত্তে হুদুম ফেলে
যেয়োন দেশ ছাড়ি।
চিদে গরর নি?
কাপ্তে গোধার ফেনা ফেনা পানিলই
ডুবি যার মাদি অঝমী রস
পরাণ বাজেবঙ কেনে
দাঙদাঙ্যে মোনো পাদারত।
বুঝিবার সেরেজটা গরর নি এনে?
এচ্চে বম হিল্যে মারমা
পোচ্চু ত্রিপুরা তোচ্চু চাঙমা
গমে বাজি থেবার জু নেই আর হিল চাদিগাঙত।
জুম্মধন, জুম্মোবি রংচঙ্গে চোকশমা হুলি রিনি চ,
বাঙাল সোম্মোন এহ্ হিলোসেরে
লুগে দিবার চাদন আমা রীদি সুধোমানি
এগদিন থেই ন’পেবং ইদু,
দিন দিন আঝি যার আমা মা-ভাচচানি।
সেত্তে জাতভেই জুম্মধন, জাতবোন নোনাবি
রংধং নঅ থেব গোদা জনমান
জাত্যত্তে চিদে ন’গললে
চিদিরে হবাউন নাঙভাজ লুগে দিবাক,
সক্কে- ম কধানি মনত উদিবো
ভালেদ অহ্ অক্ত থাক্কে
হুয়ান গম হুয়ান ভাঝছারা
চিদে গুরি ল।
