নিউটন চাকমার দু’টি চাকমা কবিতা
১. কালা কবা
সেক্কে আন্ধার লামি এযের,
ঘর তলে পত্থান গমে চিন্ পাঙ ন পাঙ ওয়ে
আবাদাগুরি এক ঝাগ্ মানজোর
আদানা থার গল্লুং, হালিক কন্না ভিলি ন থারেলুঙ।
হানক্কন বিদি যাঙ ন যাঙ
পরানর দুগদুগনি রহ্ত্তুন বেশ রহ্ শুনিনেই বুজিলুঙ
মানুজ আরো বেশ যাদন ভিলি।
মানজোর আদানা রহ্লই
ঘর শালবান্ ছিনি যেবার ভ ওয়ে।
মা-ত্তুন পিজের গুরিলুঙ, মা কলদে
আ কী অদ নাকি বুজোল যার।
মা-ও থার গুরি ন পাল্ল
কন্না ভিলি সিগুন, হি অর।
হানক্কন পরে বাবা কল-
আহ্ কন্না অব কালা হবাউনে কন হিত্যে যাদন ভিলি।
সে কধা শুনি মা কবালত্ আত্ অল
বানা কলদে এচ্ছি কা কবালত দুগ আগে হিজেনি?
২. সুগোর আহ্জা
দগদক্যে রোদোর ছদগে কিয়্যে পুড়ি যেবার ভ ওয়ে,
তুও যাঙর বড় মুরোবোর লাঙেল পত্থান বেই
সুগো আহ্জা বুগোত বান্যে গুরি।
গোদা জনমান শুনি এযঙর আমা হিলর দুগর কধা,
সে দুগর কধা ইদোত তুলি মনে মনে কঙর।
মুজুঙে দিনোত সুগোর দেঘা পেবং নি?
মরে মুই বুঝ দোঙর হিলত সুগ ফিরিবো ভিলি,
হালিক নুও তম্বাউনোর জধাবল ন অলে!
আমা হিলোত সুগ ফিরিবো নি?
শুন্নোঙ জুম্মবিরে ভিলি উদিচ্ মিলেই ন পাত্তন তা ঘোরবোই,
মনে মনে কঙর ইয়ানো কি কালা কবাউনোর কাম নি?
লুগেই দিলাক আমা জাদর বোন কল্পনারে যেঙেরি।
আহ্ কেনে ফিরিবো সুগ হিলোত ইঙিরি?
লোরা খাদে খাদে দ ধেই যেবার জাগা নেই আর,
তো কিয়া বোনলক, ভেই লগ, তোমার উচ্ ন ফিরের?
উচ্ ন অলে সুগ্ ফিরিবো হি?
উচ্ ফিরেই উজেই এজ মুজুঙে দিনোত,
যেন পুগ’ হিত্যে রাঙা বেলান উদে, সেঙেরি
আমা হিলোত সুগ ফিরেই পারি।
