অম্লান চাকমা
ও বিজু, তরে মুই সেদিন্যে তে আওজে বরণ গুরিম
ঘুরঘুজ্জে হালা মেঘর চাগ ছাড়ি যেদিন্যে
সাংসাঙে ওই উদিবো গোদা এই হিল চাদিগাং,
গোলাপ জলর শুদ্ধ-সাংঙ্ঘ ঝড়-ফুদোই যেদিন্যে
হালে-নালে, ইজে-মাজে ঝাকঝাক্কে গরি ভরি উদিবো
চেঙে-মেওনি-কাজলং, কর্ণফুলী আ বড়গাং।
তরে মুই সেদিন্যে তে আওজে গোজি লোম
যেদিন্যে লংগদু, লোগাং, নান্যেচর, কলমপতি, পানছড়ি
মাটিরাঙ্গা, ভূষণছড়া, বাঘেইছড়িত ভাজি জিয়ে লৌ শুঘেই যেব,
যুগ যুগ ধরি তলে লামেই থোয়ে শাসকউন
নিজেজ ফেলে নপাজ্জে ডেবাপেরাকত যেদিন্নে
হিজেক সারি মুরোল্যে আদাম ছাড়ি যেই
নূও গুরি ‘হিলো বুগ’ পোতপোত্যে ওই ফুদি উদিবো।
তরে মুই সেদিন্যে তে মন হুজিয়ে ধারোজ গুরিম
যেদিন্যে কল্পনারে লুগে দিয়ের ন্যায্য বিজের অভ
যেদিন্যে আদরর পো, আওজোর নেক আরেয়ে মা-উনে
স্বাধীন হিল চাদিগাং, জিংহানি স্বাধীন মনে গুরিবাক,
যেদিন্যে লারমা স্যারর দেগে দ্যে পধত
আঝার আঝার বিজয়গিরি লামি এবাক
যেদিন্যে কেওক্রাডং, হুগি মোন আ ফুরোমোন গুজুরি উদিবো
সেদিনোত সং হুজির রঙ আনি জমেই রাগা, ও বিজু
মন আওজে সাঝেই তুলিম তরে মুই সেদিনোত।
